Lliteratura

Lliteratura
Les hestories pequeñes son les úniques que pues lleer milenta vegaes...

domingo, diciembre 7

Tierra de Llárimes, Toya "Lafuente"

Uno no es lo que es por lo que escribe, sino por lo que ha leído.


            El 16 de xunetu averábase, el día en que Toya cumplía 19 años, y en que, había otros diez, el so güelu morría. Una esplosión siguía sonando n'Asturies, tiñida de llárimes negres dende 1949.
            Los idílicos viñeos de Cangas nun fixeron nunca escaecer a Toya el Pozu María Lluisa y la so anterior vida en Ciañu. El gas que-y arrampuñó la vida al so güelu, les mesmes condiciones de trabayu que fixeron al so padre a xubilase debíu a dificultaes respiratories.
            Obligada a ensordar la so voz, por ser fía de proletarios, por ser muyer, por vivir en tierres apoderaes pol miéu, pola represión. Pasaben los años, precisaba glayar, poder facer un homenaxe, al so güelu, a tolos finaos, víctimes de les condiciones de la minería. Toya buscaba, non un ochobre como'l de 1934, sinón un 16 de xunetu con llibertá, nel que poder recordar a les víctimes y, asina, empezar una llucha conxunta. Tol pueblu alzaría la voz, pidiendo xusticia, esixendo una meyora nes condiciones del llabor mineru, que nunca se repitiera una traxedia como la del María Lluisa.
            El miéu a la represión fixo acallantar en Cangas, la llucha de Toya. A pocos díes del so cumpleaños suañaba con un vistíu, escuru, con un pequeñu estampáu blancu xeométricu. Descritu con procuru y fonderamente, tantu que la so madre reconoció fácilmente la prenda. Igual qu'aquel enllordiáu de pólvora tres la muerte d'Aida Lafuente esi 13 d'Ochobre. Amburaba en miéu de perder a la so fía por causa de la so busca incesante de xusticia, pa ella'l pasáu, pasáu tenía que ser. Sobre la cama de Toya, una bandera d'Asturies. El color azul, tapáu por gruesos trazos de piedra de carbón, tiñíu de negru.
            Unes voces oyíanse dende la plaza de Cangas. Xubida a un altillo, Toya, ensin el so vistíu, pero con tola so fuerza, entonaba n'alto l'himnu Santa Bárbara Bendita. Pocos valientes acompañábenla nel so cantar, la rabia reflexábase nos sos güeyos marrones, sintiéndose llibre de lluchar. Farta d'esconder y d'acallantar la so voz, pola España en que vivía, y pola so condición de muyer, precisada de dar xusticia a les víctimes. Atayó'l so cantar l'avisu d'un oyente, la policía fuera sollertada. Escapó, intentó escondése, col únicu oxetivu de retardar el so futuru, yá inapellable.
            Tres apenes una hora los grises atopábanse na casa familiar, la so madre baxaba les escaleres, corría, tapada con una toquía Les sos miraes cruciáronse, papándose. Toya, garrada por dos trabaos homes, con una fonda ferida na pierna. Dábase la noticia de la so detención, condergada por alteración del orde públicu. Antes d'intentar escapar de la represión, esta algamárala.
            Un 16 de xunetu, décimu aniversariu de la traxedia, el so espíritu, la so llucha, condergaos. Una mocedá arrebatada, el nuevu símbolu del heroísmu femenín ástur apagábase en Cangas. A la mesma edá que la Rosa Roxa d'Asturies, yá quince años tras.

            Mentanto, a lo cimero del Conceyu de Cangas del Narcea, ondeaba una bandera de la provincia tiñida de negru, engurriada, enllordiada na so base de sangre. Nel suelu del balcón, una bandera azul arrancada.