La piedra la cruz
Riscaba
l’alba en Las Aceñas, a la vera d’un ríu Navia. L’augua que percorría
arrastrando milenta hestories diferentes de tolos qu’ellí crecieron.
Bernabé
yera un mozu que vivía cola so ma y el so hermanu Fonsín nuna pequeña y vieya
casina no que anguaño yera’l pueblo nel que de les sos aceñes namás quedaba’l
soníu y una pequeña amuesa de lu que foi n’orixe. Un encantu máxicu qu’atrapaba
la mente d’un neñu como Fonsín. Nun llograba dexar una tardi ensin falar, dibuxar,
o lleer delles hestories. El so rinconín yera ente los xuncos del Balmeón, nes
coraes del llugar. Cada una de les libélules que-y facíen sonrir yeran les
mesmes que provocaben que Bernabé-y riñera por creer nesos rellatos, nesos
amuletos que solu ocupaben espaciu nel cuarto’l neño.
Yera yá pela mañana cuando un discutiniu ente los dos hermanos
fizo que les coses nun volvieren ser lo mesmu nel pequeñu pueblu. El llantu
Fonsín y la regañina Bernabé oyíanse dende’l molín. Baxaba per un camín dexando
de llau al pequeñu hasta qu’acabara de llorar. Sentose nuna piedra que
s’atopaba xunto al llavaderu.
Onde
de normal víase la villa, esa nueche afayó una cenciella casina, con una muyer
na entrada. Ella facía-y dir a la so vera. Dixera-y qu’oyera el discutiniu con
un rapacín y llamábalu a averase. Bernabé fixárase nel llugar, vía les paredes
feches por piedres asitiaes, los cobertores de ganchiyu al traviés de la
ventana. Mentanto, los pelos llargos y blancos de la muyer tapaban-y casi tola
cara alredor d’unes arrugues qu’acompañaben unos güeyos negros. Traces que
facíen entrugase a Bernabé si yera en verdá o non una muyer.
Les
pallabres reprochaben al mozu’l comportamiento col so hermanu. Bernabé nun
creía na mitoloxía, nin nada fora les lleis de la lóxica. Sicasí, colgaba del
so pescuezu una quiastolita. Darréu s’entamó una hestoria alrodiu de la maxa
d’aquella xema. Diba años, nun sabíase cuántos, el tarrecíu diañu tratara de
xubir pel ríu Navia hasta llegar a les veres d’Illano, onde atopábense tolos
vecinos medrosos. La criatura trató de llegar, pero la presencia d'estes
piedres máxiques torgaron el so apuerto, dexando llibre de desgracia estes
tierres... Esmolecíase’l mocín al acabar y entrugára-y el motivu de saber una
hestoria qu’el enxamás oyera cuntar a los sos vecinos nin a naide del pueblu. Namás
escuchábase falar alrodiu d’una lleenda que dicía que les piedres de la cruz
yeren llárimes petrificáes d’una muyer…y solo tuvo por respuesta que nas
lleendes siempres hai dalgo de verdá. Garró’l so colgante y lu ximelgó demostrando
que ninguna piedra ye de proteición.
Oyó
la voz la so madre dende lo altu’l llar. La nueche cayera y tuviera fuera
demasiaes hores, a pesar de que namás sintiera tar un ratu. Llevantóse pa facer
señal de que s’atopata bien. Llanzó una mirada escontra tras pa despidise. Un
respigu percorrió’l so cuerpo y la medrana marcóse nos sos güeyos al no afayar
detrás d’él más qu’unos murros baltaos, llenos de hiedra y yerbes, metanes los
cualos atopábase rotu'l so colgante.
